ABECEDARIO TRIESTINO
per A
el capo te son
de quela eleta schiera
che a botega sta da mane a sera
i lavora come no
lori i paga fior de tasse
(ma i me lassa in strada casse )
co i orari i me incasina
co i riposi i me rovina
ogni tanto i se dispera:
manca i sciavi
ghe xe un novo supermarchet
turno unico o spezzato?
semo zà nell’europeo mercato?
e per cocolar l’eleta compagnia
te ghe canti la sempiterna
come sinfonia.
per B
ator
diretor
candidato ulivista
nova lista
avanti con Lamberto
rinegando el tuo
omonimo
Norberto.
per C
te viravi de là
e te ieri za quà
te confluivi con Quel
e za iera quel’Altro
tuto un missiot
un MIS più del MAS
un su e zo de tira
e (boia chi) mola
credo
che el tuo sponsor sia
HATU’
produtor de
tesere de caucciù.
per D
te trovo in comision
in presidenza
(e un geton de presenza)
costante inaugurante celebrante
in consiglio
in direzion
(e de presenza un altro geton)
dal Prefeto in Farneto e in via Lazareto
ai veci sempi un discorseto
che no i pissi sempre in leto
e via andando de qua e de là
spendendo el geton de l’ubiquità.
per E
quando te me svolarà
perchè la vita
pe ‘naltra strada
te girarà
anche TriEste cambiarà
senza la tua E
Triste sarà.
per F(1)
un tempo
curar iera l’intento
l’alevamento
de le mulete
senz’altro chicchessia
magari in alegria
ma se sa che un MANIFESTO lento
da un SECOLO no porta giovamento
e no parlemo de la disperazion
che ne procura la LIBERAZION
con l’agravante po
del pindolo pensante
de cure bisognoso
per l’irrequieto animo
e l’ibernato coso…
no te resta che el raboso.
per F(2)
te camini e te se fermi
e da fermo te camini
te se àncori al canton
e te riva un maloron
che oror che oror che oror
xe speranza sia un tumor
le ganasse le xe smorte
za balugina la morte
per fortuna tua e mia
la tua grande ipocondria
se trasforma
in poesia
e così sia.
per G
povero useleto
a furia de
gorghegiar
dei SI de repertorio
te diventerà
fio de Iorio.
per H
Margherita
più che un nome o un fior
xe una dita de spedizion
de mesagi
a le stele
dale più fiape ale più bele
par caturar polvere de stele
Margherita
con le dita
del canocial ‘riva in veta
in bicicleta.
per I
le liste
za viste
le torziola strache
da una fufigna
a un mercato de vache
la tua
piena la xe
de giuda de iago
e tanti perchè
meio saria zigar
cafè.
per L
adeso che te son fora dai freschi
voria
che mi ti Rita e Maria
fussimo ingrumadi
da un respiramento
de boravia
e butadi in riva
de quel’isola che ne speta da
tempo
ma ch’el poco
tempo
no ne fa ‘rivar
e là vardar la vita
davanti a Biribir
fermi in poltrona
e se proprio ne tien
stracantar…
ma sotovose.
per M
povero picio
infanzia triste
a Trieste
po
militanza
con baldanza
indi
tricolore
picchiatore
infin(i)
aleanza
con creanza
e adeso
el dopio peto
te va streto.
per N
bel te ieri
elegante
te le ciapavi
ma te ne tornavi
tante
del mondo campion
fora dal ring
te frequenti un nero liston
but be happy and sing
a song
viva là e po gong.
per O
come la canzoneta
te lavoravi in arsenal
e con la lambreta
te sguatavi de roian fin al fanal
po el teatro e el cine
xe tuto altro
ma ritovarse in amicizia
xe anca meio
se contemo
e semo sempre un fià de meno
ma no se spaventemo
sburtarò ulmo el bicer verso de ti
e fraternamente bevaremo
note e dì.
per P
la tua no par ‘na libreria
perchè se stà tropo in alegria
ne ricorda un’ostaria
de quand’ierimo muleria
e all’universitas se ‘ndava
pel disdoto che i ne conzava
là gavemo smeso d’andar da quel’ora
de ti se vien ancora…
e alora
oste della malora
bibendum
ad maiora!
per Q
ogni giorno legemo
el giornal che te dirigi
…ara ara xe ‘ndà anche Memo
…cossì vecio iera Gigi?
dopo le segnalazion
ghe xe la precisazion
con l’asicurazion
che el scovazon
no farà più spuzon
foto tessera formato
le vite del prossimo passato
poco o gnente
tanto per insempiar la gente
bugiardelo i lo ciama
un giornal picolo el xe.
per R
quando che me toca de star via
regalarte un paiazeto te voria
ch’el salti in pista in vece mia
e zigando e balando el scazi via
quei nuvoli de malinconia
che te ‘riva col dolor
da quel grumo
che te ga nel cuor.
per S
saria anca tempo cara tina
de piantar strazze e cusina
ciapar su una matina
andar in riva al mar
e vardando el castel de miramar
tirar
un bel bocon de aria fina
cara tina
lassar fioi nesse e connessi
sentai sul sol
desmentegarse el cuor che diol
pogiarse al parapeto
e caliparse par cambiare
un altro spagnoleto.
per T
inventarte bisognassi
se no te fossi
ma dove ciapassi
l’acqua del mar
miga dai fossi
e el siel con che
blu
lo penelasi
e dopo come te paressi
no
farte cussi bela e
stupida
come te son
no podaressi.
per U
tte ppituri
tte sscrivi
tte ccongiuri
tte rrivi
tte vva
ccome uun eelastico
ttuto
tte gga rradopià
dda qquando
tte sson ssul
llastrico.
per V
ogni libro che vien fora
casca dentro
le tue man
te lo palpi te lo chiosi
te se inventi i paragoni
(zo i cativi viva i boni )
la scritura
la brosciura
citazion
ispirazion
zon zon
el mercaton
ga le sue leggi…
ma ‘sti libri
ti li legi?
per W
anche ti
te ga piantà atrezi
e bandiere
per conquistar altre frontiere
una corente
un movimentum
un grupo studi
un referendum
te son proprio un bon
exemplum
de mobilità
e
de flessibilità.
per Z
magari col mitico carro
quando sarà tempo
( e non aver furia )
zerca de zinzolarme
pianin pianin
cussì indormenzandome
anderò in pari
del sonno
che no go dormì.
indice
A ADALBERTO DONAGGIO
B BOBBIO ORAZIO
C CAMBER GIULIO
D DAMIANI ROBERTO
E EUGENIA
F FRANCESCA LONGO
F FABIO BENES MODER
G GORI GIANNI
H HACK MARGHERITA
I ILLY RICCARDO
L LUBIS BRUNO
M MENIA GIANFRANCO
N NINO BENVENUTI
O OMERO ANTONUTTI
P PORRO PIERO
Q QUAIA MARIO
R RITA
S SANTINA TINA
T TRIESTE
U UGO PIERRI
V VALERIO FIANDRA
W WILLER BORDON
Z ZIMOLO